Kinders moenie in die water mors nie!

Ons dink vandag oor hoe ons simbole gebruik wanneer ons kerkhou.
Simbole is doodgewone dinge, en simboliese handelinge is alledaagse goed wat jy doen, maar jy heg daaraan ʼn spesiale betekenis en dit kry vir jou uitsonderlike waarde.
Ons het almal ons eie simboliese handelinge, en ons eie stel simbole. Maar simbole hou ook groepe bymekaar. Dié simboliese goed word gom wat mense aanmekaar heg en gemeenskappe laat vorm. Om agter te kom wat daai simbole vir die groep werd is, moet jy net een keer daarvoor lag of daarop trap.
Hoe ons kerkhou, is vol simboliese handelinge wat ons soos rites oor en oor doen. Vandag, hier by die Nagmaal, is daar sommer baie. Ek hoop julle sal sien wat hierdie goed vir julle werd is, en hoekom dit vir julle waarde het.

Hoe gemaak met gemorste water?

I Samuel 7 : 2 tot 17

Psalm 22

18 Februarie 2018, NHKA Kampersrus

Lydenstyd

 


Continue reading “Kinders moenie in die water mors nie!”

Advertisements

Aftelling

Beeldhouwerk van Lorenzo Quinn

Telkens, in Februarie en Augustus is daar minder van ons.

Elon Musk se SpaceX Heavy is triomfantelik gelanseer na ʼn lang aftelling van al hoe minderwordende sekondes.  Net so tel die Weskaap agteruit na Dag Zero toe, maar met heelwat minder plesierige vooruitsigte.  Ons ook.  Eerder as dreunend in ʼn rookwolk opstyg hemelwaarts, gaan ons stilweg, ongesiens, ʼn onmerkwaardige heengaan tegemoet.

Lidmate registreer dit nie.  Dit is immers die Here se tempel.  Ja, en ons maaksel.  Ons brouwerk. Ons mislukking. Kerke kom en gaan.  Ons neem nie almal self verantwoordelikheid nie, en staan teleurgesteld as die ander ouens wat dit moes doen, nie die knoop kon deurhaak nie.

As ons ooit gewonder het hoe ingebed die kerk is in ons kultuur, is die gekanker van ons Kerk die getuienis wat die saak beklink.

Gisteraand weer begrotingsvergadering gehou, planne beraam oor hoe om 2018/19 te oorleef.  Dit sal wonderwerke en genade verg.  Van moeë mense, die klompie wat in die krimpende kerkie al swaarder vragte dra te midde van moeiliker as ooit persoonlike omstandighede.

Die eerste paar weke van die akademiese jaar op UP was altyd vir my die ergste: Die leeslyste het my oorweldig; al hoe meer en al hoe gouer na mekaar het die toetse mekaar opgevolg.  Vreemd, maar ʼn mens leer die druk en die tempo hanteer, al is dit nou om leeswerk onder ons te verdeel en opsommings in die groep te versprei.

Dit sal dus seker nog weer beter gaan, maar begrotingseisoen is nie die lekkerste tyd van die jaar nie.  Dat dit met Februarie saamval, maak dit erger.  Augustus kom dit weer.

Dis dan dat jy opnuut agterkom nog meer mense het besluit hierdie kerk, hierdie gemeente, hierdie dominee, hierdie eredienste, hierdie manier van glo, doen dit nie meer vir hulle nie.  En hiervoor help geen koekiesbak-en-beesslag-basaar nie.  Dan stik jy aan soet koesisterstroop wat jou keel brand.

Here, hoe draai ʼn mens die agteruitgang om?  Nou nog, erken ek, weet ek nie.

Ek smag na die skouspel van ʼn hemelvaart, of dalk net die wakkerword van ʼn opstanding. (En kyk nou net hoe maak die klein wêreld van my eiebelang van die stomslaan van opstaan ʼn basaartafel of ʼn truuk vir gemeentebou!)

 

 

Gesondheid!

ʼn Heildronk op saamwees.

Johannes 2 verse 1 tot 11

11 Februarie 2018, NHKA Kampersrus

Epifanie, Voorbereiding vir die Nagmaal

sea-sunset-beach-coupleHoe ernstig ons ookal raak oor die huwelik, ons sukkel om dit reg te kry, en nog meer om dit te laat hou.  Met die tong in die kies, sê my pa altyd hy het nog nooit egskeiding oorweeg nie, maar moord baie.  Party mense vat dit baie ernstig op en doen presies dit.  Baie mense lag nie vir die grappie nie; dit laat ʼn bitter smaak.  Kyk maar “Skelmpie” op KykNet.  Dis nie snaaks nie.

Baie van ons sit in huwelike wat erg seermaak, oor ons nie moord of egskeiding oorweeg nie, maar uithou en aanhou want ons voel ons het geen keuse nie: ons wil God nie teleurstel nie, kinders nie ontwrig nie, ons familie nie in die skande steek nie, wat gaan buitendien dan van ons word?  En party van ons voel selfs ons verdien dit om swaar te kry en moet daarom maar net vasbyt. Selfs in huwelike vol geweld.

Almal hoop heimlik dat daar iewers vandaan ʼn wonderwerk sal kom.

Kom ons praat vandag met God oor sáámwees en saamblý.

Oor verhoudings en verbintenisse.


Continue reading “Gesondheid!”